Monday, April 30, 2018

改變

毋免T老師講,我嘛知影家己有較大箍,毋過,我一點仔都無要意啊!

若欲有通揀,一項是像以早瘦瘦、身材實櫼實櫼,毋過一堆毛病;閣一項是變較大箍,毋過風疼、痔瘡、睏袂好勢、起凊瘼...等等一大捾講會了袂盡的症頭攏總好去,免講我嘛甘願大箍無要緊!無遐的病疼佮欠點來觸纏,日子有偌爾仔爽神恁敢知?

爽神甲我愛煩惱家己會親像祖師爺講的「爛瘡一下好,就袂記得疼。」有影,這站仔練功,時間無以早遐長,真害。

毋但身體規个有較好,精神嘛較定著,暗時睏,袂閣驚東驚西矣。

講這个袂驚,我個人捌有三款經歷。

頭一款,是猶信耶穌的時,心內若有驚惶,就祈禱佮唱歌呵咾主,將家己交佇上帝手裡,相信上帝有相佮佇咧,保護照顧,這乎,有時有效,有時陣是家己咧騙家己,無講攏有路用。

閣一款是上蓋bái的向時,啥物都毋信,嘛因為按呢,啥物都毋驚,橫直人肉鹹鹹,欲哺做伊來。咱老實講,這嘛毋是袂驚,這是存範死加鐵齒。

啊若這站仔的毋驚,是有影袂驚矣,檢采是身體較好,心嘛得著安搭,氣有較沉,嘛毋知愛驚啥,這才是正港的平安。

啊這个平安,嘛是予我本底漚kóo的身體好起來的形意拳仝時予我的另外一項禮物。

昨暗,閣聽著L老師舊症頭夯起來咧慒心,啥物工課都袂做得,我想,伊最近睏定著嘛閣佮進前仝款,歹睏去矣!伊信上帝信甲遐迷,毋過數十冬過矣,煞連身體、心理都顧袂好勢。

Tann我共伊的上帝講sa-ió-ná-lah了後,總算揣著「有應效、無嘐潲」的寶貝,聽老師教,家己好好仔練就有改變,實拄實的方法,敢有人嘛欲來試看覓?

No comments: