煞有這款人

聽錄音

昨昏坐遊覽車欲轉--來，發現坐我正爿較頭前一排的彼對翁仔某真怪奇，毋是因為彼个查埔人規頭殼頭毛白siak-siak，嘛毋是彼个查某人頭鬃電甲若釋迦牟尼佛的頭一丸一丸，是in佇半路，提手機仔開youtube，開始聽中華人民共和國國家主席習進平講話！

彼个講話的都合檢采是中共的啥物大會，所擺演講真正式，閣不止仔長，啊in兩个無掛耳機仔，聲放--出-來，手機仔攑佇in兩个人的中間，聽甲耳仔覆覆，雖然in無開足大聲，毋過邊仔的人是聽有--的。一時間，我袂克根欲問：「Tann我是佇北韓--nih？！」

「In是啥人？」我心內好玄甲，敢講in心內真尊敬習進平，嘛對中華人民共和國死忠？抑是講，in是啥物特殊單位ê人，著愛隨時斟酌了解中國的官方訊息？

因為毋是家己一个去參加遊覽，顧慮較濟，終其尾我是無去問--in，總--是，咱共想看覓，欲臆in是佗一款人，kánn無遐oh--啦--honnh！

按呢，敢毋是真恐怖？